मोठी बातमी l लोणावळ्यात एमडी ड्रग्जीची मोठी कारवाई; वलवण येथील नीता इन हॉटेल परिसरात २.९१ लाखांचा मुद्देमाल जप्त

लोणावळा : पुणे ग्रामीण पोलिसांच्या स्थानिक गुन्हे अन्वेषण शाखेने लोणावळा परिसरात कारवाई करत एमडी ड्रग्ज बाळगल्याप्रकरणी मुंबईतील ३३ वर्षीय तरुणाला ताब्यात घेतले. शाहरुख आतिख शेख (वय ३३, रा. रॉयल हाऊसिंग सोसायटी, म्हाडा कॉलनी, शिवाजीनगर, गोवंडी, मुंबई) असे त्याचे नाव आहे. त्याच्याकडून २४.१९ ग्रॅम एमडी पावडर, मोबाईल फोन आणि अन्य मुद्देमालासह एकूण २ लाख ९१ हजार ९०० रुपये किमतीचा मुद्देमाल जप्त करण्यात आला. शनिवार, दि. २४ ऑक्टोबर २०२६ रोजी रात्री सुमारे १०.२० वाजता स्थानिक गुन्हे शाखेचे पथक लोणावळा शहर पोलीस ठाण्याच्या हद्दीत गस्त घालत होते. यावेळी लोणावळा शहरातील वलवण गावात नीता इन हॉटेलजवळ, मगनलाल चिक्कीच्या दुकानाशेजारी शाहरुख शेख हा बजाज सीटी १०० दुचाकीवर (क्रमांक MH03DY7271) थांबलेला आढळला. त्याची तपासणी केली असता, त्याच्याकडे प्लास्टिकच्या पिशवीत एमडी पावडर आढळून आली. या प्रकरणी लोणावळा शहर पोलीस ठाण्यात अमली पदार्थ आणि मनःप्रभावी पदार्थ अधिनियमाच्या (NDPS Act) कलम ८(क) व २२(ब) अंतर्गत गुन्हा दाखल करण्यात आला आहे. जप्त केलेला अंमली पदार्थ कुठून आणला आणि त्याचा पुरवठा कोणी केला, याचा तपास पोलिसांकडून सुरू आहे. ही कारवाई पुणे ग्रामीणचे पोलीस अधीक्षक संदीपसिंह गिल, अपर पोलीस अधीक्षक शुभम कुमार आणि मावळचे उपविभागीय पोलीस अधिकारी गजानन टोंपे यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक प्रमोद क्षीरसागर, लोणावळा शहर पोलीस ठाण्याचे पोलीस निरीक्षक महेश विधाते यांच्या मार्गदर्शनाखाली पोलीस उपनिरीक्षक अभिजीत सावंत, ग्रेड पोलीस उपनिरीक्षक विनोद भोकरे, पोलीस हवालदार संतोष शेळके, सागर नामदास, गणेश होळकर, गणेश धनवे, सिद्धेश्वर पाटील, तुषार भोईटे तसेच लोणावळा शहर पोलीस ठाण्याचे पोलीस उपनिरीक्षक प्रवीण लोकरे, पोलीस हवालदार सतीश घोंगडे, संदीप मानकर आणि पोलीस शिपाई श्रीराम बोराडे यांनी या कारवाईत सहभाग घेतला.

Accident News l लोणावळा कुणेगाव हद्दीत रस्ते अपघातात दुचाकी चालकाचा जागीच मृत्यू

लोणावळा ग्रामीण पोलिसांची मोठी कारवाई; २६ वर्षांपासून खुनाच्या गुन्ह्यात फरार असलेला आरोपी पवनानगरमधून जेरबंद

Lonavala News l लोणावळ्यात दोन व्यक्तींचा एकमेकांवर चाकू हल्ला; हल्ल्याची घटना कॅमेरात कैद

मावळ तालुक्यातील भाजे गावात डोंगर गायरान जमिनीच्या खरेदी-विक्रीचा प्रकार उघड; 9 जणांवर गुन्हा दाखल - ग्रामस्थांचे २९ ऑक्टोबरपासून आमरण उपोषणाचा इशारा

लोणावळा : लोहगड व विसापूर किल्ल्याच्या पायथ्याशी असलेल्या मावळ तालुक्यातील ऐतिहासिक भाजे गावातील डोंगर गायरान जमिनीची खरेदी-विक्री केल्याचा गंभीर प्रकार उघडकीस आला आहे. या प्रकरणी ग्रामस्थांनी दिलेल्या तक्रारीवरून पौड पोलीस ठाण्यामध्ये नऊ जणांच्या विरोधात गुन्हा दाखल करण्यात आला आहे. मात्र तरीदेखील प्रशासनाकडून कोणतीही दखल घेतली जात नसल्याने संतप्त झालेल्या भाजे गावातील समस्त ग्रामस्थांनी २९ ऑक्टोबर २०२६ रोजी वडगाव मावळ येथील तहसील कार्यालयासमोर आमरण उपोषणाला बसण्याचा इशारा दिला आहे. भाजे ग्रामस्थांनी पत्रकार परिषद घेत गावाच्या गायरान जमिनीची खरेदी विक्री झाली असल्याची माहिती दिली. या प्रकरणातील फिर्यादी रघुनाथ मराठे म्हणाले, भाजे गावातील सर्व्हे नंबर ६१ (नवीन गट नंबर १००, क्षेत्र १६ हेक्टर ३६ आर) ही जमीन सन १९४२ पासून सातबारा उताऱ्यावर डोंगर गायरान' आणि 'सामायिक इनामदार' म्हणून नोंदवलेली आहे. १९५४-५५ नंतर कागदपत्रांमध्ये कोणतीही कायदेशीर पूर्तता नसताना काही जणांची नावे बेकायदेशीरपणे कुळ किंवा इतर हक्कांमध्ये समाविष्ट करण्यात आली. २०१५-१६ मध्ये सातबारे ऑनलाइन होत असताना तलाठ्याच्या चुकीमुळे सामाईक असा शेरा आला, तर इतर हक्कांत 'महाराष्ट्र खाजगी वने संपादन अधिनियम १९७५' नुसार महाराष्ट्र शासन वने असा स्पष्ट शेरा आहे. हे सर्व कायदेशीर पुरावे आणि खाजगी वनशेरा असतानाही, ३ ऑगस्ट २०२६ रोजी दस्त क्रमांक ७३७०/२०२६ द्वारे सदर डोंगर गायरान जमीन काही एजंट आणि खरेदीदारांच्या नावे खरेदी-विक्री करण्यात आली. ग्रामस्थ म्हणाले, दस्त नोंदणी झाल्यानंतर अवघ्या दोन दिवसांनी, म्हणजेच ५ ऑगस्ट २०२६ रोजी मुळशी-पौडचे दुय्यम निबंधक श्री. एम. व्ही. क्षीरसागर यांनी भाजेच्या गावकामगार तलाठ्यांना पत्र लिहून कबूल केले की, “मिळकतीची नोंदणी करताना सातबारावरील खाजगी वनशेरा तपासायचा राहून गेला व अनावधानाने खरेदी खताचा दस्त नोंदवला गेला, त्यामुळे या खरेदी खतावरील फेरफाराची नोंद रद्द करण्यात यावी.” असे असूनही प्रत्यक्षात प्रशासनाकडून ठोस कारवाई झाली नाही. याप्रकरणी भाजे ग्रामस्थांनी २ सप्टेंबर २०२६ रोजी महसूल मंत्री, स्थानिक आमदार, जिल्हाधिकारी, प्रांताधिकारी, तहसीलदार, पोलिस अधीक्षक, दुय्यम निबंधक यांसह तब्बल १२ वरिष्ठ सरकारी कार्यालयांमध्ये आणि पोलीस ठाण्यांमध्ये तक्रारी अर्ज देऊन रीतसर पोहोच घेतल्या. मात्र, महसूल प्रशासनाकडून कोणतीही दखल घेतली गेली नाही. अखेर प्रशासनाच्या भूमिकेविरोधात आक्रमक होत ग्रामस्थांनी पौड पोलीस ठाण्यात संबंधित व्यक्तींविरोधात गुन्हा नोंदवला आहे. शासकीय नियमांना व वनांच्या जमिनीच्या कायद्याला डावलून झालेल्या या व्यवहाराविरोधात ग्रामस्थांनी आता २९ ऑक्टोबरपासून तहसील कार्यालयासमोर आमरण उपोषणाचा एल्गार पुकारला आहे. भाजे गावाचे गायरान हे पुन्हा भाजे गावाच्या नावावर व्हावे. गायरानाच्या जागेची खरेदी विक्री करणारे व त्यांना सहाय्य करणारे खाजगी व्यक्ती व सरकारी अधिकारी कर्मचारी या सर्वांवर कठोरात कठोर कारवाई व्हावी अशी मागणी भाजे ग्रामस्थांनी केली आहे. बाळू गबळू मरगळे, शंकर धोंडीबा मरगळे, संगीता गबळू मरगळे, मंगल गबळू मरगळे (सर्व राहणार मळवली भाजे), सत्यजित वाजपेयी, सुनंदा सत्यजित वाजपेयी (दोघे राहणार खारपाडा पेन रायगड), हिया अभय कुंदालिया (खारघर रायगड), अविनाश जांभुळकर (कुरवंडे लोणावळा), पार्थ अशोकभाई कटारिया (काळाचौकी पुणे) या नऊ जणांवर पौड पोलीस ठाण्यात फिर्यादी रघुनाथ मराठे यांच्या तक्रारीवरून गुन्हा दाखल करण्यात आला आहे.

मावळ तालुक्यातील सात हजार विद्यार्थ्यांच्या कलागुणांचा झाला गौरव !

मावळ तालुक्यातील देवले गावात सापडला 12 फुटी अजगर

संपर्क संस्थेसाठी केलेल्या सामाजिक कार्याबद्दल एकलरेक्स कंपनीला प्रतिष्ठित ‘महात्मा पुरस्कार’;२७ हजारांहून अधिक नागरिकांच्या जीवनात घडविला सकारात्मक बदल

मुसळधार पावसाच्या पार्श्वभूमीवर पुणे जिल्हा प्रशासनाची सतर्कता; ३० जणांची सुटका, २७० हून अधिक नागरिकांचे सुरक्षित स्थलांतर

पुणे, दि. ६ जुलै : पुणे जिल्ह्यात ५ व ६ जुलै रोजी झालेल्या अतिवृष्टीमुळे काही ठिकाणी दरडी कोसळणे, पूल पाण्याखाली जाणे तसेच रस्ते व रेल्वे वाहतुकीवर परिणाम होण्याच्या घटना घडल्या. प्रादेशिक हवामान विभागाने रेड अलर्ट जारी केल्यानंतर जिल्हा प्रशासनाने तत्काळ सर्व यंत्रणा सज्ज करून महसूल, पोलीस, अग्निशमन दल, एनडीआरएफ, एसडीआरएफ तसेच स्थानिक स्वराज्य संस्थांच्या समन्वयातून युद्धपातळीवर बचाव व मदतकार्य राबविले. या कार्यवाहीत ३० जणांची सुरक्षित सुटका करण्यात आली, तर २७० हून अधिक नागरिकांचे सुरक्षित स्थळी स्थलांतर करण्यात आले. दुर्दैवाने मावळ तालुक्यातील पाटण येथे घरावर दरड कोसळून ३ जणांचा मृत्यू झाला.जिल्ह्यातील २७ महसूल मंडळांमध्ये ६५ मिमीपेक्षा अधिक पाऊस झाला असून मावळ तालुक्यात सर्वाधिक २३७.३ मिमी पर्जन्यमानाची नोंद झाली आहे.मावळ तालुक्यात तळेगाव परिसरात पाण्यात अडकलेल्या कंपनीच्या बसमधील ३० कर्मचाऱ्यांना अग्निशमन दलाने सुरक्षित बाहेर काढले. ताजे गावातील डोंगरपायथ्यावरील सुमारे २५० नागरिकांचे सुरक्षित ठिकाणी स्थलांतर करण्यात आले. मुंबई–पुणे द्रुतगती मार्गावरील मिसिंग लिंक परिसर तसेच लोणावळा–कर्जत रेल्वेमार्गावरील दरडी हटविण्याचे काम युद्धपातळीवर सुरू असून वाहतूक पूर्ववत करण्यासाठी संबंधित यंत्रणा सातत्याने कार्यरत आहेत.हवेली तालुक्यातील भावडी येथे पाच कुटुंबांतील २२ ते २४ नागरिकांना सुरक्षित स्थळी हलविण्यात आले. देहू, आळंदी आणि इतर पूरग्रस्त भागांमध्ये नागरिकांच्या सुरक्षेला प्राधान्य देत पूल व धोकादायक मार्ग तात्पुरते बंद करण्यात आले. आळंदी येथे इंद्रायणी नदीच्या वाढत्या पाणीपातळीमुळे मंदिर परिसर आणि धर्मशाळांमधील भाविकांना सुरक्षित स्थळी हलविण्यात आले. Bमुळशी, भोर, वेल्हे, खेड, पुरंदर तसेच इतर तालुक्यांमध्ये दरडी कोसळलेल्या ठिकाणी तातडीने यंत्रणा पाठवून दगड-माती हटविणे, रस्ते खुले करणे, बॅरिकेडिंग करणे आणि धोकादायक भागातील नागरिकांचे स्थलांतर करण्याची कार्यवाही करण्यात आली. अनेक ठिकाणी संभाव्य धोका ओळखून वाहतूक बंद करण्यात आल्याने मोठ्या दुर्घटना टाळण्यात प्रशासनाला यश आले. पुणे शहरातील सदाशिव पेठेतील धोकादायक इमारत तातडीने रिकामी करण्यात आली. पिंपरी-चिंचवड व शिरूर येथील घटनांमध्येही संबंधित यंत्रणांनी तत्काळ प्रतिसाद देत मदतकार्य सुरू केले असून बेपत्ता व्यक्तींचा शोध सुरू आहे.मुख्यमंत्री, उपमुख्यमंत्री तथा पालकमंत्री यांनी घेतला परिस्थितीचा आढावा; प्रशासनाला सतर्क राहण्याचे निर्देशमुख्यमंत्री देवेंद्र फडणवीस यांनी दूरदृश्य प्रणालीद्वारे पुणे जिल्ह्यातील अतिवृष्टीच्या परिस्थितीचा आढावा घेऊन जिल्हाधिकाऱ्यांकडून सविस्तर माहिती घेत आवश्यक त्या सूचना दिल्या. उपमुख्यमंत्री तथा पालकमंत्री सुनेत्रा अजित पवार यांनीही जिल्ह्यातील प्रत्येक घडामोडीची सातत्याने माहिती घेत संबंधित यंत्रणांच्या अधिकाऱ्यांशी दूरध्वनीद्वारे संपर्क साधून आवश्यक सूचना दिल्या तसेच पुढील दिवशीही पूर्ण सतर्कता बाळगण्याचे निर्देश दिले.  जिल्हाधिकारी जितेंद्र डुडी यांनी दिवसभर सर्व तालुक्यांतील परिस्थितीचा सातत्याने आढावा घेत महसूल, पोलीस, आपत्ती व्यवस्थापन तसेच इतर संबंधित यंत्रणांमध्ये समन्वय साधून बचाव व मदतकार्य प्रभावीपणे राबविण्याच्या सूचना दिल्या. जिल्हाधिकारी यांच्या मार्गदर्शनाखाली जिल्हा प्रशासनाची सर्व यंत्रणा २४ तास कार्यरत असून परिस्थितीवर सातत्याने लक्ष ठेवण्यात येत आहे. नागरिकांनी अफवांवर विश्वास न ठेवता केवळ अधिकृत माहितीवर विश्वास ठेवावा, अनावश्यक प्रवास टाळावा आणि प्रशासनाच्या सूचनांचे काटेकोर पालन करावे, असे आवाहन जिल्हा प्रशासनाने केले आहे.

मोठी बातमी l भिकमुक्त पुणे जिल्हा मोहिमेचा राज्यस्तरीय निर्धार; भीक मागणाऱ्यांचे होणार पुनर्वसन

मराठी पत्रकार संघाच्या राज्यस्तरीय महाअधिवेशनात मोठी घोषणा; सर्व जिल्ह्यांत पत्रकार भवनासाठी जागा देणार - मंत्री चंद्रशेखर बावनकुळे

सूक्ष्म योगा फाउंडेशनचे पंकज शर्मा यांना आदर्श महाराष्ट्र रत्न पुरस्कार २०२६ प्रदान