Lonavala News l कोकण विभाग पदवीधर मतदारसंघासाठी लोणावळ्यातील निखिल कवीश्वर यांच्यावर नवी मुंबईची जबाबदारी
लोणावळा : कोकण विभाग पदवीधर विधानसभा मतदार संघासाठी येत्या 26 जून रोजी मतदान होणार आहे. निवडणुकीसाठी काँग्रेस पक्षाकडून महाविकास आघाडीचे उमेदवार म्हणून रमेश श्रीधर कीर हे निवडणुकीच्या रिंगणात उतरले आहेत. कीर यांनी पक्ष संघटनेच्या माध्यमातून कोकण विभागामध्ये चांगले काम केले आहे. सामाजिक, राजकीय, शैक्षणिक, सहकार या सर्व क्षेत्रांमध्ये त्यांनी भरीव काम केले आहे. त्यांच्या विजयासाठी या निवडणुकीमध्ये काँग्रेस पक्षाकडून जोरदार मोर्चे बांधणी करण्यात आली आहे.
महाराष्ट्र प्रदेश काँग्रेस कमिटी कडून लोणावळा शहरातील युवा नेतृत्व असलेले महाराष्ट्र प्रदेश काँग्रेस कमिटीचे सरचिटणीस निखिल कवीश्वर यांच्यावर नवी मुंबईची सह समन्वयक पदाची जबाबदारी देण्यात आली आहे. निखिल कवीश्वर हे लोणावळा नगर परिषदेचे माजी नगरसेवक असून पक्ष संघटनेच्या माध्यमातून त्यांनी विविध पदांवर कामे केली आहेत. तसेच कर्नाटक राज्य, महाराष्ट्र राज्य या ठिकाणी झालेल्या विधानसभा व लोकसभेच्या निवडणुका, यामध्ये त्यांनी पक्ष संघटनेच्या माध्यमातून अनेक मतदारसंघांमध्ये व जिल्ह्यांमध्ये प्रभारी म्हणून देखील कार्यभार सांभाळला आहे. पश्चिम महाराष्ट्र व कोकण भागात देखील त्यांनी प्रभारी म्हणून काम केले असल्याने त्यांचा या सर्व भागांमध्ये दांडगा जनसंपर्क आहे. याकरिताच पदवीधर मतदार विधानसभा निवडणुकीमध्ये त्यांच्यावर कोकण विभागातील उमेदवार कीर यांच्या प्रचारांमधील सह समन्वयक पदाची नवी मुंबईची जबाबदारी देण्यात आली आहे.
याविषयी बोलताना कवीश्वर म्हणाले, पक्ष संघटनेने माझ्यावर विश्वास टाकत मोठी जबाबदारी दिली आहे. यापूर्वी दिलेल्या सर्व जबाबदाऱ्या मी यशस्वीरित्या पार पडल्या आहेत. यावेळी देखील संघटनेने माझ्यावर टाकलेला विश्वास मी सार्थ करून दाखवेल.
खासदार विशाल पाटील यांचा लोणावळ्यात सत्कार
नुकत्याच झालेल्या लोकसभा निवडणुकीमध्ये सांगली मतदार संघातून अपक्ष म्हणून निवडणूक लढवत विजय झालेले काँग्रेसचे विशाल पाटील यांनी आज लोणावळ्यातील महाराष्ट्र प्रदेश काँग्रेस कमिटीचे सरचिटणीस निखिल कवीश्वर यांच्या संपर्क कार्यालयाला सदिच्छा भेट दिली. यावेळी गवळीवाडा येथील श्रीराम मंदिरात खासदार विशाल पाटील यांचा सत्कार सन्मान निखिल कवीश्वर व गवळीवाडा येथील ग्रामस्थांच्या वतीने करण्यात आला. यानंतर निवडणुकीमधील चर्चा व येऊ घातलेल्या पदवीधर विधानसभा मतदार संघाबाबत चर्चा करण्यात आली.
