संकल्प नशा मुक्ती अभियान अंतर्गत लोणावळा ग्रामीण व शहर भागात पोलिसांची कारवाई; 3 किलो गांजा व प्रतिबंधित गुटख्यासह सुमारे 3 लाख 87 हजार रूपयांचा मुद्देमाल जप्त

लोणावळा : लोणावळा उपविभागाचे सहायक पोलीस अधीक्षक सत्यसाई कार्तिक यांनी उपविभागाचा पदभार स्वीकारल्यानंतर अवैध धंद्यांवर व गुन्हेगारांवर कायदेशीर कारवाईची मालिका सुरूच ठेवली आहे. संकल्प नशा मुक्ती अभियान अंतर्गत लोणावळा ग्रामीण भागातील भैरवनाथ परिसर व लोणावळा शहरातील इंद्रायणीनगर भागात कारवाई करत 3 किलो गांजासह प्रतिबंधित गुटखा असा 3 लाख 87 हजार रुपयांचा मुद्देमाल जप्त केला असून 5 जणांवर गुन्हा दाखल करण्यात आला असल्याची माहिती सहायक पोलीस अधीक्षक आयपीएस सत्यसाई कार्तिक यांनी दिली. 

       गेल्या काही दिवसांपासून लोणावळा विभागात अमली पदार्थांची चोरून विक्री होत असून त्यामुळे परिसरातील तरुणाई नशेच्या आहारी जात असल्याची माहिती सत्यसाई कार्तिक यांना मिळाली होती. त्यासाठी सत्यसाई कार्तिक यांनी संकल्प नशामुक्ती अभियान हाती घेऊन त्याअंतर्गत परिसरातील युवकांमध्ये जनजागृती करणे, तसेच अमली पदार्थांचे सेवन, साठवणूक व विक्री करणाऱ्यांवर कठोर कारवाईचा बडगा उगारला आहे. संकल्प नशामुक्ती अभियानाचाच एक भाग म्हणून सत्यसाई कार्तिक यांनी मावळ परिसरातील अमलीपदार्थ विकणाऱ्या गुन्हेगारांविरोधात गेल्या काही दिवसात कठोर कायदेशीर कारवाया करून अनेक आरोपींना जेरबंद करून त्यांचेकडून मोठ्या प्रमाणावर अमली पदार्थ हस्तगत केले आहेत.  

      21 सप्टेंबर रोजी मध्यरात्री सत्यसाई कार्तीक यांना गुप्त बातमीदारामार्फत माहिती मिळाली होती की, लोणावळा भागातील भैरवनाथ नगर कुसगाव बु. परीसरात राहणारे काही इसम त्यांचे राहते घरातून गांजा व प्रतिबंधीत गुटखा त्यांचे ओळखीचे लोकांना विक्री करत असल्याची खात्रीशीर माहिती मिळाली होती. या माहितीच्या आधारे सत्यसाई कार्तिक यांनी रात्रीपासूनच भैरवनाथनगर परिसरात त्यांचे पथकासह सापळा रचला होता. मध्यरात्री 00:09 वाजण्याच्या सुमारास लक्ष्मी लॉंड्रीजवळ भैरवनाथनगर, कुसगाव बु. ता. मावळ येथे मिळालेले बातमीचे ठिकाणी पंचासमक्ष छापा टाकला असता सदर ठिकाणी 3 इसम मिळुन आले. त्यांचेकडे चौकशी केली असता त्यांनी उडवाउडवीची उत्तरे दिल्याने व त्यांच्यावर संशय बळावल्याने पोलीस पथकाने जागेवरच पंचांसमक्ष नमूद इसमांचे ताब्यातील क्वालिस गाडी व घर झडतीमध्ये 737 ग्रॅम गांजा व नमुद इसमांचे ताब्यात असलेल्या चारचाकी वाहनामध्ये 128 पुड्डे विमल पान मसाला प्रतिबंधित गुटखा मिळुन आला आहे. सदर कारवाईमध्ये गांजा, प्रतिबंधीत विमल पान मसाला गुटखा व चारचाकी वाहन असा एकुण 3 लाख 27 हजार 137 रूपयांचा मुद्देमाल पंचासमक्ष ताब्यात घेण्यात आला आहे. यातील इसमांकडे केलेल्या प्राथमिक चौकशीमध्ये सदरचा माल विक्री करता जवळ बाळगला असल्याचे सांगितले आहे. या प्रकरणी आब्बास तपषिर खान उर्फ अरबाज (वय 21), आवान आब्बास तपषिर खान उर्फ मुन्ना (वय 19, दोघे रा. लक्ष्मी लॉंड्रीजवळ, भैरवनाथनगर, कुसगाव बु. ता. मावळ, अश्विन चंद्रकांत शिंदे (वय 38, रा. के के बाजार समोर कुसगाव बु. ता. मावळ) यांच्या विरोधात लोणावळा ग्रामीण पो.स्टे. येथे एनडीपीएस व इतर विविध कलमा अन्वये गुन्हा नोंद करण्यात आला आहे. पुढील तपास लोणावळा ग्रामीण पो.स्टे चे सहा. पोलीस निरीक्षक प्रशांत आवारे हे करत आहेत.

      दुसरी कारवाई ही लोणावळा शहर पोलीस स्टेशन हद्दीतील इंद्रायणीनगर लोणावळा येथे करण्यात आली. त्याठिकाणी महेमुना सत्तार कुरेशी या राहत्या घरातून तिचा कामगार राजु लहु जाधव (रा. इंद्रायणीनगर) या हस्तकांकरवी ओळखीचे इसमांना गांजा या अमली पदार्थाची विक्री करत असल्याची खात्रीशीर माहिती मिळाली होती. सदर ठिकाणी पथकाने छापा टाकला असता 2 किलो 168 ग्रॅम गांजासह रोख रक्कम असा एकुण 59 हजार 880 रूपये किमतीचा मुद्देमाल पंचासमक्ष जप्त करण्यात आला आहे. प्राथमिक चौकशी मध्ये सदरचा माल विक्री करता जवळ बाळगला असल्याचे सांगितले आहे. महेमुना सत्तार कुरेशी (वय 54), राजु लहु जाधव (वय 55, दोघे रा. इंद्रायणीनगर, लोणावळा) यांच्या विरोधात लोणावळा शहर पोलीस स्टेशनला एनडीपीएस व इतर कायद्यांन्वये गुन्हा दाखल करण्यात आला असून सदर गुन्हयाचा पुढील तपास पोलीस उपनिरीक्षक रमेश भिसे हे करत आहेत. 

     संकल्प नशामुक्ती अभियानांतर्गत केलेल्या वरील दोन्ही कारवाईमध्ये अंदाजे 3 किलो गांजा, 128 प्रतिबंधित विनम पान मसाला गुटख्याचे पुड्डे व एक क्वाॅलीस गाडी असा एकूण 3 लाख 87 हजार रुपये किमतीचा मुद्देमाल जप्त करण्यात आला आहे. सदरची कारवाई पुणे ग्रामीण पोलीस दलाचे पोलीस अधीक्षक पंकज देशमुख, अपर पोलीस अधीक्षक रमेश चोपडे यांचे मार्गदर्शनाखाली लोणावळा उपविभागाचे सहा.पोलीस अधीक्षक सत्यसाई कार्तिक, सपोनि प्रशांत आवारे, मसपोनि विजया म्हेत्रे, सपोनि राहुल लाड, पोलीस उपनिरीक्षक लोसरवार, पो.हवा नितेश (बंटी) कवडे, म.पो.हवा अश्विनी शेडगे, पो.कॉ गणेश येळवंडे, सुभाष शिंदे, गणेश ठाकुर, प्रतिक काळे, पो.हवा. हनुमंत वाळंज, संदिप मानकर, पो.ना. हनुमंत शिंदे, पवन कराड, म.पो. शी अक्षदा तावरे, कोमल निंबाळकर या पथकाने केली आहे.