लोणावळा शहरात तीन ठिकाणी मटका अड्ड्यांवर व एक ठिकाणी बेकायदा दारू विक्री करणाऱ्या वर कारवाई

लोणावळा : लोणावळा शहर पोलिसांनी लोणावळा शहर हद्दीमध्ये बेकायदेशीरपणे सुरू असलेल्या मटका अड्ड्यांवर धडाकेबाज कारवाई करीत सदरचे अड्डे बंद केले. पोलिसांनी एकूण तीन मटका अड्ड्यांवर छापा टाकून 4 आरोपींना ताब्यात घेतले असून 6410 रुपयांचा मुद्देमाल जप्त केला आहे. याशिवाय बेकायदेशीर दारू विक्री करणाऱ्या एका व्यक्तीवर कारवाई करीत त्याच्या ताब्यातील 1400 रुपयांच्या 40 बाटल्या जप्त करण्यात आल्या आहेत.

      प्रभारी पोलीस निरीक्षक अरुण फुगे आणि सहाय्यक पोलीस निरीक्षक राहुल लाड यांच्या मार्गदर्शनाखाली लोणावळा शहर पोलिसांनी केलेल्या कारवाई मध्ये किरण राजु जाधव, विकास भिमाजी पैलवान, वैभव भगवान साठे, अशोक जगन्नाथ फाळके या चौघांना तीन वेगवेगळ्या अड्ड्यावर लोकांकडुन पैसे घेवुन कल्याण मटका नावाचा जुगार खेळत असताना ताब्यात घेतले. या सर्वांवर महाराष्ट्र जुगार बंदी अधिनियम कलम 12 (अ) प्रमाणे गुन्हा दाखल करण्यात आला आहे.

     दुसऱ्या एका कारवाई मध्ये राजु प्रभाकर जाधव याला बेकायदा बिगर देशी दारू विक्री करीत असताना ताब्यात घेण्यात आले. त्याच्या विरोधात महाराष्ट्र दारु बंदी अधिनियम क 65 (ई) अन्वये कारवाई करण्यात आली आहे. या सर्व कारवाई मध्ये पो. हवा. राहुल पवार, पो. कर्मचारी रमेश उगले आणि पवन कराड आदींनी सदर कारवाई मध्ये भाग घेतला. पो. हवा. मयूर अबनावे यांनी हे गुन्हे दाखल करून घेतले असून पो. हवा. शकील शेख, म्हेत्रे, आणि पो. ना. शिंदे हे पुढील तपास करीत आहे. लोणावळा शहरात जुगार, मटका यांना बंदी असून अशा प्रकारचे अड्डे कुठे सुरू असल्यास नागरिकांनी त्याची माहिती पोलिसांना द्यावी असे आवाहन लोणावळा शहर पोलिसांकडून करण्यात आले आहे.