आयपीएस सत्यसाई कार्तिक यांची धडक कारवाई - पाथरगाव येथे एमडी पावडर जप्त; दोन जण ताब्यात

लोणावळा : पाथरगाव च्या हद्दीत मुंबई पुणे राष्ट्रीय महामार्गावर एका हॉटेल समोर आयपीएस सत्यसाई कार्तिक यांच्या पथकाने एका चारचाकी वाहनातून आलेल्या दोघांवर कारवाई करत त्यांच्याकडून एमडी नावाची ड्रग्स पावडर जप्त केली आहे. याप्रकरणी पोलिसांनी चारचाकी वाहनासह दोघांना ताब्यात घेतले आहे. 29 जुलै रोजी रात्री 11.40 वाजण्याच्या सुमारास ही कारवाई करण्यात आली.

          लोणावळा उपविभागाचे सहायक पोलीस अधीक्षक सत्यसाई कार्तिक यांनी उपविभागाचा पदभार स्वीकरल्यानंतर अवैध धंद्यांवर व गुन्हेगारांवर कायदेशीर कारवाईची मालिका सुरूच ठेवली आहे. गेल्या काही दिवसांपासून लोणावळा विभागात अमली पदार्थांची चोरून विक्री होत असून त्यामुळे परिसरातील तरुणाई नशेच्या आहारी जात असल्याची माहिती श्री कार्तिक यांना मिळाली होती. त्यासाठी श्री सत्यसाई कार्तिक यांनी संकल्प नशामुक्ती अभियान हाती घेऊन त्याअंतर्गत परिसरातील युवकांमध्ये जनजागृती करणे, तसेच अमली पदार्थांचे सेवन, साठवणूक व विक्री करणाऱ्यांवर कठोर कारवाईचा बडगा उगारला आहे. संकल्प नशामुक्ती अभियानाचाच एक भाग म्हणून श्री सत्यसाई कार्तिक यांनी मावळ परिसरातील अमली पदार्थ विकणाऱ्या गुन्हेगारांविरोधात गेल्या काही दिवसात कठोर कायदेशीर कारवाया करून अनेक आरोपींना जेरबंद करून त्यांचेकडून मोठ्या प्रमाणावर अमली पदार्थ हस्तगत केले आहेत. 

         29 जुलै रोजी श्री सत्यसाई कार्तीक यांना गुप्त बातमीदारामार्फत माहिती मिळाली होती की, मौजे पाथरगाव गावचे हद्दीत काही इसम हे चारचाकी वाहनातून एम.डी हा अमली पदार्थ विक्रीकरिता घेऊन येणार आहेत. त्यानुसार श्री सत्यसाई कार्तिक यांचे पथकाने परिसरात सापळा रचला होता. मिळालेल्या बातमीप्रमाणे रात्री 11.40 वाजता पाथरगाव जवळ, जुने मुंबई पुणे हायवे रोडवरील हॉटेल मावळ माची समोर एक संशयित वाहन थांबल्याने श्री कार्तिक व पथकाने सदर वाहन थांबवून गाडीतील इसमांकडे चौकशी केली. त्यांनी चौकशीत उडवाउडवीची उत्तरे दिल्याने व त्यांच्यावर संशय बळावल्याने पोलीस पथकाने जागेवरच पंचांसमक्ष नमूद इसमांची झडती घेतली असता त्यांच्याकडे 5.05 ग्रॅम एम.डी पावडर मिळून आली आहे. प्राथमिक चौकशीमध्ये सदरचा माल हा विक्रीकरीता घेऊन जात असल्याचे त्यांनी सांगितले असल्याचे सत्यसाई कार्तिक यांनी सांगितले. 

      कामशेत पोलीस स्टेशनचे पोलीस शिपाई अमोल ननवरे यांनी दिलेल्या फिर्यादीवरून योगेश केशव गायकवाड (रा.कांब्रे, तालुका मावळ) व नारायण सोपान दाभाडे (रा. व्हिजन सिटी, जांभूळ, तालुका मावळ) यांना याप्रकरणी त्यांचे चारचाकी वाहनासह ताब्यात घेण्यात आले आहे. त्यांच्यावर एन.डी.पी.एस ॲक्ट 1985 चे कलम 8(क), 21(ब) (क), तथा भारतीय न्याय संहिता कलम 3(5) अन्वये गुन्हा नोंद करण्यात आला आहे. पुढील तपास कामशेत पो.स्टे चे पोलीस निरीक्षक रविंद्र पाटील हे करत आहेत.

      30 जुलै रोजी लोणावळ्यातील नांगरगाव भागातील देखील एमडी पावडर व गांजा सह तीन जणांना ताब्यात घेण्यात आले आहे. सदरच्या कारवाया पुणे ग्रामीण पोलीस दलाचे पोलीस अधीक्षक पंकज देशमुख, अपर पोलीस अधीक्षक रमेश चोपडे यांचे मार्गदर्शनाखाली लोणावळा उपविभागाचे सहा.पोलीस अधीक्षक सत्यसाई कार्तिक, सहा पोलीस निरीक्षक सचिन राऊळ, पोलीस उपनिरीक्षक शुभम चव्हाण, पो.हवा नितेश (बंटी) कवडे, पो.हवा अंकुश नायकुडे, पो.ना दत्ता शिंदे, पो.कॉ गणेश येळवंडे, पो.कॉ सुभाष शिंदे, पो.कॉ अंकुश पवार, पो. कॉ अमोल ननवरे, पो.कॉ महेश थोरात, पो.कॉ गणेश ठाकुर, पो.कॉ प्रतीक काळे यांच्या पथकाने केल्या आहेत.